Wednesday, July 11, 2012

TRI POEZI NGA NAGJIJE KASTRATI

 
KU TË TË GJEJ

Si të të gjej
Kot përpëlitem
Ti nuk je
As te dera
As në kopsht

St’ë shoh pranë furkës
S’të shoh pranë zjarrit
Ti nuk je
Në asnjë skutë të shtëpisë
Nuk je nënë

Kërkoje në varreza!
Thanë disa
Tmerr…
Fotografia jote
Në mermerin e ftohtë

Jo ti nuk je
Ti s’je nënë
Se unë të lash
Te dera e oborrit
Aq të bukur

Të të gjej desha
Se kisha për të thënë
Ma bëj “hallall”

1994
 
 
 
 
 
BËHU

Bëhu burrë- gjyko
Bëhu trim- fal
Bëhu ndjenjë – dashuro

Bëhu shi- rigo
Bëhu lum- rrjedh
Bëhu agim- zbardh.

Mos u bëj
Skëterrë e zezë
Mos nxij!

Shihe diellin
Qiellin e hënën
Lejo të bjerë shi!

Natyra do zverdhet
Kur të kujtohesh ti!

2003
 
 
 
 
 
 
KUSH MA DHA SHARRËN

Si të të shoh
E brishtë je
Shiton shpirtin tim
Të kam lënduar fort

Lënduar kam
Unin e shkrumuar kaherë
Nëse është mbetur diç
Nga gjaku
Jeta
Lënduar kam

Smund të të shoh
T’i shartova degët
T’i cungova nyjet
T’i këputa sythet
Që buloje në mua

Lënduar je
Gjithmonë labirintheve
Nëpër rrugë qorre pa krye
Vrarë të kam

Po ti, si bulon?!
T’i cungoj nyjet
T’i këpus sythet
T’i…
Kush ma dha këtë sharrë?!

2006
 
__________________________
Marrë nga "Sofra poetike" në FB
 

Monday, July 2, 2012

Nikollë Loka: RRON GURAKUQI

 
Rron Gurakuqi

Kur linde ti,
Shkodra ngriti perçen
e të pa djepin,
shtëpisë davaritej
malli për një bir,
në strehë
të shtëpisë sate
një pëllumb
e bëri çerdhen
dhe cicëriu:
ç'fat i mirë!

Rritu bir
të thoshte votra,
rritu bir
përsëriste Shkodra,
e nxirë krejtësisht
në fytyrë.

Shqipëria të rriti
në male,
me krisma pushkësh,
e me pak bukë,
Shqipëria të priste
për atë ditë të madhe.

Në Ditën e Flamurit,
Plakut të Vlorës,
ia shtrive
pëllëmbën e dorës.
U ngjitën bashkë ato duar,
si krahët e shqipes,
në Flamur.

Tradhëtia të vrau,
tokën e huaj e skuqi.
Vdiq Gurakuqi!

Ky lajm trishton Drinin,
me akuj mbush Bunën.

Nga larg vjen
një këngë majekrahu,
rron Gurakuqi!...