 |
| Fatmir Gjata |
MALL
Kërkoj një erë të më çojë
Aq larg sa malli të më çbëjë
Aq larg sa malli të ketë frikë
T'më përkëdhelë në ngushëllim
Përkundur në një djep të drunjtë
Me degë pemësh tharë qëkur
Sikur të kishin mallin tim
Edhe kur gjethet nuk lëvizën
Nga vorbull ndryrë aq përbrënda
Kërkoj një fllad të ëmbëlsuar
Puthjen e fundit të ma sjellë
E të më thotë pse ish e fundit
E të më thotë pse ish e para
E pse se dhamë të ma thotë
E gjitha pse-të t'më tregojë
Duke shëtitur nga nuk mundëm
Të shihja prej sysh të mbyllur
Një uturimë mbledhur në gjoks
Që s'diti kurrë të shpërthejë
Kërkoj një copëzë pasqyre
Të më shikojë të përmalluar
Edhe të bëhet mijra pjesë
E të kërkonjë e të të gjejë
Në ishe fshehur veç nga unë
Sa për të lozur pak me mallin
Sa për të lozur pak më mua
Duke dërguar rreze dielli
Që të më ngrohë në lëkurë
Keine Kommentare:
Kommentar veröffentlichen