Shaip Beqiri: ORFEU ME GUZHMA RESH

Shaip Beqiri

ORFEU ME GUZHMA RESH

Hijeve që i mbrun pëlhura e arnuar me purpur
U zdërgja lozja jote nga e cila rashë përdhe
Me guzhma resh të përskuqura lart ndër rrufe
Erdha të përtërij këngëtimin që këputa dikur

Me myk e baltë e terr aq egërsisht zhgërryer
Te gjunjtë e Euridikës që la grahmën në lirë
Mespërmes tufanit rashë në tempullin e nxirë
Me e ngjallur me këngë frymën duke ia kthyer

Një shushunjë erdhi zvarras nëpër hejza dite
Shteroi gjak e lotë prej gotës sime të thyer
U ngjit në krye të valles te një qoshe prite

Në gji toke hyra veç gur përgjithmonë i çarë
Por as fshehtësive që mora me balsam përlyer
S`u vuri përsipër kurorën kaherë të përtharë